Bibliografia

Sicilianu English

Sta paggina prisenta na bibliografia annutata dî risorsi linguistichi siciliani ca mi aiutanu a sviluppari stu prujettu. Cunteni puru àutri dizziunari siciliani notabili e risorsi online. Sta lista di risorsi nun è cumprensiva, ma avissi a essiri utili a qualcunu ca si ntiressa â lingua ed â cultura.

fonti dû dizziunariu

Arba Siculawww.arbasicula.org

  • Arba Sicula è la preminenti organizzazioni culturali siciliana in America. Dû 1979 pubblica libbra e rivisti supra la storia, lingua, littiratura, arti, folklori e cucina siciliana.
  • Tanti dî risorsi discritti nta sta pagina foru pubblicati di Arba Sicula o sviluppati cu la sò aiutu.

Gaetano Cipolla Learn Sicilian (2013) e Learn Sicilian II (2021).

  • Learn Sicilian prisenta un libbru di testu e DVD p'un corsu introduttivu dâ lingua siciliana. È chinu di dialoghi, grammatica, saggi culturali e fotografia. È tantu chiù d'un libbru di testu. È na introduzioni cumpleta â Sicilia, la lingua, la cultura e la genti.
  • Learn Sicilian II fa chiù prufunna la canuscenza dû litturi. Aumenta lu vocabbulariu dû litturi spiegannu l'usu di prifissi, suffissi e disinenzi, accussì ca lu litturi mpara a capiri palori ca nun ha mai vistu prima. E discrivi ogni parrata dâ lingua, aiutannu a lu litturi a ricanusciri li relazzioni tra la lingua scritta e chidda parrata in ogni parti dâ Sicilia.
  • L'autori, Gaetano Cipolla, è lu prisidenti e lu diritturi di Arba Sicula dû 1987. Ha editatu e traduciutu assai volumi di puisia siciliana ed è unu dî massimi esperti ntô campu.

Arthur Dieliwww.dieli.net

  • Ô sò situ pirsunali, Arthur Dieli prisenta na ricchizza di articuli accademici, risorsi linguistici ed àutri nfurmazioni supra la lingua e cultura siciliana.
  • Fu unu di li primi a pubblicari online un vocabbulariu sicilianu. Lu sò vocabbulariu cunteni chiù di 12.000 palori e frasi siciliani, la parti di discursu e traduzzioni in inglisi e talianu. Lu vocabbulariu di dr. Dieli ispirau e abbijau stu prujettu di dizziunariu.
  • Pubblicau puru un libbru di Proverbi Siciliani ca scegghi un pruverbiu pi cintinara di palori siciliani, traduzzioni dî pruverbi in inglisi, la fonti dû pruverbiu e (quannu nicissariu) na brevi spiegazioni d'iddu. Offri na manera divirtenti di mparari lu sicilianu, un pruverbiu a vota.

Kirk Bonner (2001). Introduction to Sicilian Grammar.

  • Darreri lu titulu modestu "Introduzioni," Kirk Bonner scrissi un libbru dî reguli dû quali si pò difiniri na lingua "siciliana stinnarda." L'opira di dr. Bonner furnisci lu mudellu ca aduttaru Wikipedia Siciliana ed àutri.

Sicilian Wiktionaryscn.wiktionary.org

  • Li sò utenti ci hannu contribbuitu chiù di 18.000 vuci di palori siciliani. E chî vuci ci sunnu definizioni, la pronuncia, l'etimologia, li palori currilati e li traduzioni in àutri lingui.
  • Cunteni puru na grammatica concisa ed esempi di verbi regulari, di verbi irregulari e dû verbu aviri.

Giuseppe Pitrè (1875). Grammatica Siciliana.

  • Comu parti dî sò 25 volumi supra lu folklori sicilianu, Giuseppe Pitrè includìu li sò noti supra la lingua siciliana. Sti paggini si pubblicanu oggi comu un libbrettu ntitulatu Grammatica Siciliana.
  • Lu libbrettu discrivi na teoria di soni adattati dû latinu e comu ddi soni si diffirenzanu attraversu li parrati siciliani. Lu libbrettu havi puru na teoria di formi grammaticali.
  • Oggi lu ristampa na pocu di casi editrici, e rivinnituri online di solitu ni hannu na copia in magazzinu.

Vincenzo Mortillaro (1876). Nuovo Dizionario Siciliano-Italiano.

  • Vincenzo Mortillaro stabbilìu un obbiettivu ambizziusu quannu scrissi lu sò dizziunariu. Nun aveva a essiri un "dizziunariu palermitanu" o na "rapsodia di dialetti." Lu sò obbiettivu era di "ricogghiri lu ciuri dâ lingua universalmenti parrata in Sicilia" usannu na ortografia cumuni.
  • Lu sò dizziunariu prisenta definizioni chini di ditagghi, traduzzioni ed esempi. E la grannizza dû sò dizziunariu suggirisci ca riniscìu a ricogghiri ddu ciuri dâ lingua.
  • Na copia digitali è dispunibbili a Google Books. Li copi ristampati sunnu dispunibbili a Gyan Books.

Vincenzo Nicotra (1883). Dizionario Siciliano-Italiano.

  • Scrivennu ntô 19-esimu seculu, Vincenzo Nicotra vuleva ca li siciliani mparanu la lingua taliana. E pi aiutarli, scrissi un gran vocabbulariu chinu di esempi e pruverbi. Reggistrau d'accussì la saggizza dû populu sicilianu.
  • Ntâ prifazioni Nicotra vantau li vantaggi di l'iniziativa di Pietro Giordani di "abbannunari li dialetti a l'usu domesticu." Chissu pò dari fastiddiu a nu studenti dâ lingua siciliana ntô seculu 21-esimu, ma aveva boni ntinzioni. Vuleva ca li siciliani parrassiru beni la nova lingua nazzionali.
  • Salvu diversa indicazioni, li pruverbi prisintati ccà venunu di lu dizziunariu di Nicotra. Lu sò reggistrazzioni d'accussì tanti suggirisci ca vuleva puru ca li siciliani avissiru na bona canuscenza dâ sò lingua.
  • Na copia digitali è dispunibbili a Google Books. Li copi ristampati sunnu dispunibbili a Gyan Books.

Joseph F. Privitera (2003). Sicilian Dictionary and Phrasebook.

  • Cu l'intenzioni di scriviri un libbrettu di cumpagnu pî miricani ca visitanu la Sicilia, lu dizziunariu di Joseph Privitera cunteni na grammatica concisa, un libbru di frasi e un dizziunariu cu 3400 vuci dî palori chiù cumuni.
  • Dr. Privitera pubblicau puru na introduzioni â lingua siciliana, Beginner's Sicilian, ca a paraguni cu àutri risorsi disponibbili oggi nun è la megghiu, ma – quannu fu pubblicatu ntô 1998 – fu la prima grammatica siciliana scritta p'un pubblicu di lingua nglisi e fu la prima grammatica pubblicata di chidda di Pitrè ntô 1875.

àutri opiri nutevuli

G. Piccitto, G. Tropea and S.C. Trovato (1977-2002). Vocabolario Siciliano

Joseph Bellestri (1985-1988). Sicilian-English Dictionary and English-Sicilian Dictionary

  • Un paru di dizziunari pî siciliani nta li Stati Uniti. Fu lu primu vocabbulariu sicilianu-nglisi.

Ignazio Sucato (1975). La Lingua Siciliana: Origine e Storia

  • Na storia concisa dâ lingua parrata dû populu sicilianu di tempi preistorici ô prisenti. Cu listi dî sò contribbuti linguistici, Sucato spiega comu populi diversi influinzaru la lingua ca li siciliani parranu oggi.
  • Sucato susteni ca lu sicilianu scinni direttamenti dâ lingua sicula ca era simili ô latinu. Pruponi ca la genti cuntinuava a parrari la sò lingua indigena senza riguardu a cui guvirnava l'isula. Poi, doppu ca li nurmanni scunfiggiru a l'arabi, la lingua parrata dû populu sicilianu di tempi preistorici suverchiau, ciurennu eloquentimenti cu la Scola Siciliana di Puisia na para di decenni doppu.

Alberto Varvaro (2014). Vocabolario Storico-Etimologico del Siciliano

  • Un dizziunariu ca escludi palori taliani pi priviliggiari palori dû patrimoniu lessicu dâ Sicilia.

Antonino Traina (1868). Nuovo vocabolario siciliano-italiano

  • Scrivennu pocu doppu l'unificazioni d'Italia, Traina vuleva ca li siciliani mparassiru l'italianu e vuleva ca mparassiru puru lu sicilianu. A viduta di Traina, li taliani avissiru a canusciri li palori di ogni pruvincia picchì li palori di na pruvincia rapprisentanu l'idei di dda pruvincia.
  • Na copia digitali è dispunibbili a Liber Liber.

Santu Rapisarda (1842). Raccolta di Proverbj Siciliani Ridutti in Canzuni

  • Quattru volumi di pruverbi siciliani fatti nta l'oggettu di puisia.
  • Na copia digitali è dispunibbili a Google Books.

Luigi Accattatis (1895). Vocabolario del Dialetto Calabrese

  • Un vocabbulariu dû dialettu casalinu-apriglianisi (pruvincia di Cosenza).
  • Na copia digitali è dispunibbili a Google Books.

Orlando AccettaDizionario Napitino

  • Un vocabbulariu di chiù di 1000 palori dâ parrata napitina di Pizzu Calabbru (VV).

Giuseppe PresicceDialetto Salentino

  • Noti supra la grammatica e un vocabbulariu di chiù di 8000 palori dâ parrata di Scurranu (LS).

LecceWeb.itDialettario Salentino

  • Un vocabbulariu dâ parrata lecchisi.

Mario RosatiSalviamo il siciliano!

  • Un vocabbulariu di chiù di 1500 palori, chiù di 400 pruverbi e espressioni, e na granni selezioni di cultura siciliana.

Angelo ConiglioThe Sicilian Language

  • Noti supra la lingua e la cultura siciliana. Includi un bonu paraguni dî parrati siciliani.

Uliana SentsovaSicilian-Spanish Translator

  • Sviluppatu pi Apertium, l'opira di Sentsova fu lu primu sforzu di criari un tradutturi miccanicu pi la lingua siciliana.

Copyright © 2018-2024 Eryk Wdowiak